Title: Nga Korero Paramete: 1886-1890

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Horomona Paatu.

H. K. Taiaroa.—I au e tuku atu nei i te motini e mau nei i toku ingoa, me whakaatu atu au ko Horomona Paatu he tangata rangatira. Ko ona tupuna he rangatira anake, e whitu rawa whakapaparanga o ratou i noho ki taua whenua ki Aparima. E kore au e korero roa atu inaianei engari e hiahia ana au kia whakamana te ripoata o te Komiti.

Te motini: "Kia whakaaetia te ripoata o te Komiti mo nga Mea Maori mo runga i te pitihana Nama 18, o Horomona Paatu." E hiahia ana au kia hohoro te mahi i etahi tikanga mo aua take notemea he nui te raruraru o Horomona i a ia e noho nei, a he mea tika kia hohoro te mahi i etahi tikanga mona.

Te menemana a RENAO: Kia tukua ki te Kawanatanga ma ratou e ata whiriwhiri te ripoata a te Komiti mo nga Mea Maori mo runga i te Piithana Nama 18 a Horomona Paatu.

TE MATARA.—Ki taku whakarongo atu ki nga korero kua puta mo runga mo aua take, e mahara ake ana au ko te mea tika me whakaae atu a Taiaroa ki nga ritenga o te menemana i runga i nga kupu a Te Whitika. Kua ki mai hoki te Kawanatanga e pai ana ano ratou ki te whiriwhiri i te ripoata o te Komiti, no reira au ka mea atu kia Taiaroa me whakaae atu pea koe ki te menemana nei.

H. K. TAIAROA.—Mehemea ka ki pono mai te Kawanatanga ka tahuri ratou ki te mahi i taua mea katahi au ka whakaae atu ki te menemana a kia tere tonu te whakamana a te Kawanatanga i nga whakataunga o roto o taua ripoata.

Whakakorea ana te Motini, whakaaetia ana ko te menemana.