Hone Heke (mema mo nga Maori o te Tai Tokerau). —Ka patai ahau ki te Minita mo nga Mea Maori, He aha te take i roa ai te whakaputa o te Ota Kaunihera i raro i wahanga 10 o tekiona 14 o "Te Ture Kooti Whenua Maori, 1894," mo tetahi whenua, ara, ko tekihana 26, Otakou Rahui Maori, i te mea kua marama te Tumuaki Kai-whakawa o te Kooti Whenua Maori he whenua tera e puritia ana i runga i te tikanga tiaki, a kua puta tana kupu i te marama o Aperira, 1901, kia whakaputaina he Ota Kaunihera mo taua whenua?

Timi Kara (Mr. Carroll, Minita mo nga Mea Maori). —Kaore pea i te tika te korero e kiia nei i karaatitia taua whenua ki a Hone Wetere Korako i runga i te tikanga tiaki Ina hoki, no te mahinga a taua tangata i tana wira, meatia ana e ia kia wehea taua whenua hei rahui turanga whare-karakia, hei tanumanga tupapaku, a hei turanga whare-kura, a waiho ana e ia ko H. K. Taiaroa he kai-tiaki mo tona wira, a me te kupu ano i roto i te wira, me whai mana te kai-tiaki ki te whakatu i tetahi Komiti hei hoa mona ki te whakahaere i taua wahi whenua. Kua tuhituhi pukapuka te Kawanatanga ki a Taiaroa mo taua wahi. Kaore ano ahau i marama tera e puta he painga mehemea ka whakatuwheratia ano te taitara o taua whenua. I wehea taua whenua hei painga mo te iwi katoa, a ki ta matou titiro kei te tika tonu te whakahaere o nga tikanga i whakaurua ki roto ki te wira.