Ko te whakataunga tenei o te whakawa mo Opoho
1. | Ko te rohe tuatahi, Arakaipaka, ko te Whakahoki, mau atu ki te Kaha-a-tureia. |
2. | Ko te he o tenei rohe ko te kiinga he rohe whenua a te Kaha-a-tureia. |
3. | Tirohia ana e te komiti tona tikanga, he kaha toki no te toki o Tureia. |
4. | Na Ngatihine tenei rohe, ko te Waiohinekura. Ko te he o tenei rohe o te Waiohinekura, na te pou a te Kapua-matotoru, i tu nei ki te ngutu-awa o Tahaenui, ko Taka te ingoa. |
5. | Ko te pou a te Kapua-matotoru ko Taka. Ko te he o tenei rohe, ko te pou a te Ruruku i roto i Opoho, tuturu ana ki reira te rohe: ko tera taha Opoho ki a te Rehu; ko tenei taha ki a Teipu. |
6. | E ki ana a Te Teira, kai te Whakaumu a te Ruruku, ka rere tona rohe ki te Waka-a-ira-a-mawake, ka whati i roto i Pohatunui. |
7. | Kimihia iho e te komiti i roto i nga kupu korero a Te Teira raua ko Teotene, e ki ana raua ki taua wahi ki te Kokohu, mo Manawa raua ko Kohaki, ko te kainga tera i tonoa mai ai e Tureia a Manawa, hei kainga mona. |
8. | Koia te he o tera rohe a Te Teira, i tae nei ki te Kokohu, heoi, whakataua iho e te komiti tana i kite ai mo te Kokohu kei roto i te rohe a Te Teira, na reira i he ai a Te Teira mo taua Kokohu. Ka tahi te komiti ka whakatau i tana i kite ai. |
9. | Ka timata atu i te ngutuawa Opoho, Puharakekenui, rere atu ki te kauanga i te Karaka, mau atu ki te rae o Kaingarara, te Whakaumu-a-te-Ruruku, mau atu ki te Uruahu, mau atu ki te rohe a Te Teira; heoi, ma koutou e whakatutuki atu. |
10. | Ko nga tangata o Rakaipaka e whai paanga ana ki te taha ki a Ngatihine me uru ki tenei taha. |
11. | Ko nga tangata o Ngatihine e whai paanga ana ki tera taha me uru ki tera taha. |
12. | Ka mutu i konei enei kupu, he mea i ata whakapuakina e te komiti ki te aroaro o nga iwi e whai paanga ana ki taua whenua, heoi whakaaetia ana e aua iwi kia noho pai ratou i runga i taua whakatanga kia rite rawa a ratou whakaaro i runga i te ngakau pai, i te ngakau tatu. Ka tahi ano ratou ka hanga mahi ma ratou ki runga i taua whenua. |
13. | Ko te komiti, kei runga tonu te mana i taua whenua me aua iwi e tiaki ana, kia pai rawa te noho a aua iwi i runga i to ratou whenua. |
14. | Mehemea ka tuku tetahi o aua iwi i taua whenua kia ruritia, kaore tetahi o aua hapu i rongo i mohio ranei ki taua ruri, e whakamahia ana ki runga i taua whenua, kaore rawa te komiti e pai ki taua mahi, kaore hoki e whakaaetia kia mahia rarurarutia ano aua iwi. |
15. | E ngari me ata whakariterite marire e aua iwi, e aua hapu ranei, o runga i taua whenua, me te rongo hoki o tenei komiti ki a ratou whakahaere i waenganui i a ratou, e marama ana ki te titiro atu, ka tahi ka whakaae kia ruritia. |
16. | A ko te wa e tino kitea ai te iwi me te hapu tuturu o taua whenua, i runga i te pai o ta ratou whakahaere marama a o ratou take paanga ki taua whenua, i te aroaro o te Kooti Whakawa Whenua Maori, ka tahi ka mutu mai te mana o te komiti i runga i taua whenua, me ana iwi, me ana hapu ranei. |
17. | Na, he panui atu tenei ki nga tangata o te Kawanatanga kia mohio koutou ki te puta atu tetahi tono a tetahi o enei iwi, hapu ranei, kia tukua mai he kai ruri i te Kawana, a, kaore aua iwi, aua hapu ranei, me tenei komiti e ata whakaae kia ruritia, kauaka e tukua mai aua kai ruri, kei raruraru ano aua iwi. |
Heoi,
Na Renata Kawepo,
Na Paoka Kaiwhata,
Na Manaena Tini,
Otira na te Komiti nui o Heretaunga.
Aperira 28, 1881.